روايه أجنحة الاحلام كاملة بقلم مريم وليد
الأطفال اللي ساعدناها وطنط.. طنط اللي سيبناها على الرصيف أنا وقصي دخلوا حضنونا بحب والأولاد أتلموا حوالين مروان وأنا بصيت لقيت قصي داخل.. قرب مننا وابتسم وهو بيحضن مروان
مبروك عليك كتكوتة العيلة يا استاذ مروان خلي بالك منها وحطها في عيونك بقى.
ابتسم ومدلي سلسلة
دي بتاعت رفيدة انت أحق حد بيها..
شاور لعمار فقرب ولبسهالي خدني في حضنه وبدأت الحفلة حرفيا قصي همس في ودني
حلمك أنت ومروان مسؤوليتي وعد هحققه تحت أي ظرف.
رجع ورا جنب أمينة فلاحظت ابتسامة على وشها استشفيت منها إنها اتكسفت بناء على مغازلة من قصي ابتسمت بحب ودبلة مروان بتدخل في ايدي! واو ده أصبح الدار أمان خلاص!
عدا حوالي سنة وشهرين كنا غالبا أستقرينا نفسيا كلنا.. كنت بتأكد في كل يوم فيهم إن مروان هو الاختيار الصحيح وقصي بقى تحفة وشايل هو وعمار شغل الشركة بشكل لذيذ ومختلف وكنا بكل فخر قربنا نعمل أحلى حاجتين في الحياة.. فرحي أنا ومروان وإفتتاح الدار في وقت قياسي.
لأ حطوا هنا أجهزة كمبيوتر علشان فيه أعمار ما بين ال ١٢ وال ١٨ هيحتاجوا العاب ودراسة.
بصيت على الجنينة برا فكان مروان واقف بيرشها روحت ناحيته واتكلمت فجأة
بخ!
ضحك وهو بيبصلي
هو إيه البخ العسولة دي ما شاء الله!
ضحكت وكملت
يلا طيب علشان أشوف أوض المسنين.
حرك راسه بماشي وكمل
يلا يا ست الكل نشوف الاوض.
أنا لفيت على كل أوض الأطفال كلهم جاهزين كل أوضة فيها تلات أطفال بس.. وقسمتهم على حسب السن والمسنين عاوزين نتأكد إن كل حاجة كاملة بقى.
طلعنا فعلا المبنى كان فيه حوالي ٢٠ اوضة.. مكناش عاوزين نكتر عن العدد ده حاليا علشان خلقهم بيكون ضيق فحبينا يكون ليهم كل واحد اوضة خاصة دخلت اوضة فبصيت بتذمر
بص يا مروان مفيش هنا ورد وناسيين الريموت.
كمل بهدوء
عادي يا حبيبتي محلولة هنروح نجيبهم حالا..
ابتسمت وبدأت اظبط المكان كنا حاطين لكل حد فيهم صوره مع أولاده وصور تانية ليه في عمره ومكان لو حد فيهم محتاج يحط صور جديدة.
دخلت اوضة طنط اللي قابلتها من فترة افتكرتها وهي بتحضني وبتهمس في وداني
ربنا هيرزقك بأولاد وعيلة جميلة علشان أنت جميلة وأحلامك جميلة.. يارب تحققي كل أحلامك يا بنتي.
ابتسمت لما افتكرت اني لما سألتها على صورة ادتني صورتي أنا وهي في فرحي قالتلي وقتها إني أنا اللي بنتها وأنا اللي استاهل الحب.
أنت فعلا تستاهلي الحب وتستاهلي كل حاجة جميلة يا سيا علشان عمرك ما حاولتي علشانك أنت.. طول الوقت بتحاولي علشان تحققي حلمك اللي هو للناس في الاساس.
بحبك اوي يا مروان بجد.
ابتسم وكمل وهو بيمدلي وردة
وأنا مبحبش قدك يا أجمل
الدار
حرك راسه بنفي وكمل وهو بيشاور عليا
أنت..
ابتسم وكمل بهدوء
بجد يا سيا أنت حلمي.. وحلمك حلمي أهم حاجة عندي تكوني مبسوطة ومرتاحة.
لأنك هنا يا مروان بجد كل حاجة بقت تحفة بعد ما جيت.
ابتسم وشاورلي على الباب
أمينة عاوزاكي ضروري.
فيه إيه!
شاورلي بأنه ميعرفش نزلت لقيتها بتجري عليا وبتحضني بتدوخ بشكل مجنون وبعدين بينتلي الخاتم
قصي عرض عليا الجواز يا سيا قالي إنه بيحبني وإنه شايف إنه مش هيعرف يكمل منغيري!
ضحكت بفرحة وحضنتها جامد أمينة جميلة جميلة جدا وتستاهل كل جميل.
يارب اشوفكم مبسوطين سوا يارب وتبقوا أحلى عوض في حياة بعض يا أجمل أمونة.
فضلت حضناني وكملت
شكرا إنك دايما هنا.
البيت وناسه والخمسة اللي أحنا منهم دول اللي لو نحتاجلهم يدونا عينهم!
كنا واقفين برا بعد ما كتبنا الكتاب وروحنا على الدار كان عمار واخدني في حضنه وبيهزر مع مروان قصي قاعد يغلس عليه ويقوله إني بنتهم كده كده ابتسمت وشاورتلهم
يلا نفتتح!
عمار ادى المقص لمروان وابتسم فمروان مده ليا وكمل
حلمك يا سيا.. يلا.
ابتسمت وأنا ببص للمقص وكملت
يلا هاتوا ايديكم انتوا التلاتة لولاكم مكنتش حققت حاجة.
فضلوا واقفين فشديت عمار وقف جنبي ومسك ايدي فمروان حط ايده فوق ايد عمار شاورت لقصي فحط
كل وعد وعدتهولك.. هوفيهولك متخافيش كل حلم هيجي وقته وبأوانه متقلقيش مش هقصر يوم معاك صدقيني.. أجمدي ده أنا بقوى بيك متضعفيش.
حضنت عمار جامد وبعدين بصيت لمروان.. قرب مني وحضني ولف بيا بمنتهى الحب وهو بيردد وراه
أنت نفسك كنت حلم في يوم حلمته فضلت أعافر في الحياة لغاية ما طولته!
كنت ماسكة في رقبته بحب وفرحة كنت مبسوطة ومرتاحة وحاسة بأمان الدنيا كلها كنت حاسة بسكون حقيقي.. كنا محاطين بكل حد بيحبنا بجد وقفنا في النص وكله حوالينا
اضحكوا علشان نلقط الصورة!
حضنت مروان بأيد وعمار بالتانية أكاد أجزم إني في منزلي في اللحظة دي.
عدلت الصورة وأنا بشيل التراب من عليها ابتسمت بهدوء وأنا واقفة قدام رفيدة بنتي
بس كده يا روفي عرفت ازاي ماما حققت كل أحلامها علشان كده مش مهم تدخلي إيه.. المهم تكوني مبسوطة وخليك فاهمة إني فخورة بيك دايما.
جيه من ورايا باسني في خدي فابتسمت راح خد رفيدة في حضنه وكمل
وبابا فخور بروفي طول الوقت أدهم أخوكي لما دخل طب كان حلمه محدش فينا طلب منه ده فاهماني
حركت راسها بتفهم وحضنته جامد فشدني ليهم
بحبكم أوي يا بابا بجد
بص في عيوني وكمل
وأنا مش هعيش غير علشان أحقق احلامكم.
لا أدري كيف يطير المرء دون أجنحة ولكن
تمت بحمد الله.
أجنحة_الأحلام
مريم_وليد_محمد
